10ª Edición Olloboi

A Asociación Olloboi convoca o Festival de Cine escolar “OlloBoi 2021” que este ano, lonxe de renderse ante as circunstancias, trae aire fresco.

A parte da tradicional recollida de pezas a concurso, entre as que se inclúen os traballos presentados na edición especial Covídeo 2020, ofrecemos gratuitamente obradoiros en liña para alumnado de primaria ou secundaria de toda Galicia e para docentes. Na pestana da nosa web  ollobradoiros tedes información e un formulario para solicitalos.  Vídeo explicativo.

Ata o 14 de maio podedes seguir inscribindo as vosas pezas en olloboi.com, onde atoparedes as bases específicas de participación desta convocatoria. Temos 10 categorías a concurso agrupadas en ensino primario, secundario, postobligatorio e unha novidade: o Olloboi Xubiloi!

Ademais, estamos moi felices de anunciarvos que acabamos de rematar unha película sobre os 10 anos do festival. Chámase Cadernas de Olloboi, e con ela pretendemos dar unha visión sobre a evolución do uso do audiovisual nas aulas, rendendo tributo a toda a comunidade cómplice que apoia este modelo educativo-cultural tan transversal, altruísta e rebelde.  

Dadas as especiais circunstancias deste ano, non agardamos poder facer unha sesión presencial. Así e todo, organizaremos proxeccións de pezas, actividades formativas e unha entrega de premios virtual. Nas redes e na nosa web iremos ampliando detalles.

Así que… a pesar da que está caendo, querémosvos ver coa cámara na man!